بسمة مصرية

"اللي معاه فون هواوي بقى خرده"
"انت معاك فون هواوي ؟ هههه سمعت الي حصل ؟"
سيناريوهات غريبة ممكن تشوفها علي السوشيال ميديا ...
بس خلينا نفهمك الموضوع اكتر عشان مش اي حد يضحك عليك !

المسموع حاليا هو ان الرئاسة الأمريكية اعلنت عن حظرها لهواتف Huawei و ZTE في الولايات المتحدة

وزي ما قال المتحدث الرسمي "لاسباب أمنية" واللي فيها بيشكو بأن Huawei بتتجسس على الحكومة الامريكية لصالح الحكومة الصينية.

طيب ليه امريكا محددتش شركات شاومي و Vevo و Oppo بما أنهم صينيين برضو ؟

بدون تفاصيل كتير ف شركة Huawei مملوكة لرائد اعمال صيني -كان- عسكري وكذلك ZTE مملوكة لاحد العاملين بالوزارة الصينية للفضاء ..

رجوعا بالزمن في المشكلة مع الصين دي ف حصل ان في سنه 2016 في حوالي 700 مليون جهاز اندرويد تم اختراقهم ،
وبعد تحليلات جنائية اتضح ان الاجهزة دي بتبعت البيانات اللي بتتسرق لسيرفر في الصين !

ايوه الصين مالك مستغرب ليه ؟

مش بس كده ، لا ده كمان شركة One plus اتضح انها بتجمع معلومات عن المستخدمين -
مش اي نوع من المعلومات اللي اي شركة بتجمعه عادي عن المستخدم زي ما ساميونج بتعمل وزي فيسبوك
لا المره دي شركة one plus كانت بتعملك log لكل حاجه حرفيا،
فتحت الوايفاي امتى وقفلته امتى، استخدمت كل برنامج قد ايه ومن الساعه كام لكام،
مش بس كده لا وكمان كانو بياخدو معلومات ال cell phone وال IMEI
ودي حاجات محدده جدا حيث ان لكل جهاز IMEI فريد من نوعه،
وكانت بتبعت كل ده لسيرفرات الشركة دي!

_____

كل ده وبجانب بعض المشاكل السياسية زي "الحرب التجارية على الصين"
ادت الى ان الرئاسة الامريكية تاخد بعض الحوادث اللي حصلت مؤخرا في كندا وغيرها
من البلاد زي تسريبات معلومات سريه اصحابها من ممتلكين هواتف Huawei !

- معلومات اكتر عن الحرب التجارية واسبابها: TheGuardian

امريكا طلعت في قرار رسمي اعلنو حظر المنتجات بتاعت Huawei تحديدا و ZTE
من السوق الامريكي تحت تهمة التجسس زي ما مذكور في اللينك اللي فوق ...

وكمان تم القبض على بنت ال CFO بتاع Huawei في كندا.

امريكا مسكتتش بس قالت لبقاش الدول عن الخبر وان لازم باقي الدول تاخد موقف
وكمان قالت لالمانيا متستخدمش ال 5G اللي كانت هواوي مسؤولة عنه
وكمان اضافت انها هتقلل التعاملات السرية بيه.

_____

قضية سياسية كبيرة زي دي -الحرب التجارية- ادت لان شركات كبيرة زي جوجل اعلنت تأييدها
للموقف الامريكي ومنعو خدماتهم عن Huawei وده اللي هنناقشه في اخر جزأ من البوست ...
_____


المهم ان مؤسس شركة Huawei طلع في تصريح مع CNN وقال ان الشركة عمرها ما
تجسست على حد من الرئاسة الامريكية وغيره ، وبرر المشاكل اللي حصلت من هواتف هواوي
انها حالات اختراق زي اللي بتحصل لاي شركة كبيرة وان التقصير مش منهم !

وكمان قال ان اللي بيحصل في صالح الشركة !!!

مش بس كده ، لا هو كمان صرح عن فريق عملهم بقاله 3 سنين شغال في نظام تشغيل
بديل للاندرويد في حين ان الشركة احتاجته زي دلوقتي !

وكمان قال ان مبيعات الشركة في الصين مش هتتأثر عشان مش معتمدين على خدمات جوجل ...

وفي النهاية شركة هواوي قالت استنو وشوفو اللي هيحصل وكمان السفارة الصينية في
امريكا اعلنت تأييدها لشركة هواوي وعن حقها في استخدام اي وسائل للدفاع عن نفسها.

_____________

الموضوع كبير ومش هيخلص لحد كده ... بس خلينا بقى نتكلم من ناحيتنا احنا في مصر ايه اللي هيحصل لينا ؟

طبعا كل الشركات المصنعه للهواتف الذكية كانت بتعتمد على بيئة جوجل والاندرويد بتاعها -Google Ecosystem-
وكانت كل الشركات بتاخده تعدل عليه وتكمل بيه انظمة تشغيلها ويدولها واجهة مختلفة عن ال base بتاع جوجل ...

زي شاومي بتعدل وتعمل MIUI و هواوي بتاخده ةتعمل EMUI ...

ف كون ان هواوي خسرت ال base ده ف هي مش هتقدر تاخد الاندرويد في المستقبل
وتعدل عليه عشان هواتفها اللي هتنزلها في المستقبل!

وبكده مبقاش لشركة هواوي صلاحيات غير على الحاجات ال Open Sourced بس عشان تشتغل عليها

وده طبعا مش هيكون كافي ليها انها تشتغل زي الاول

اقرأ عن ال AOSP base ROMs

يعني باختصار كده هواوي ولا تسوى حاجه برا الصين بدون جوجل ! -زي ما قالت CNN-

___________

المهم ان جوجل صرحت على Twitter ان الاجهزة الحالية من هواوي هيكون شغال عليها
خدمات جوجل بشكل عادي لكن مضافوش اي تفاصيل عن الاجهزة اللي لسه هتعملها هواوي
في المستقبل ولا عن وجود تحديثات للاجهزة الحالية ...

يعني عموما اللي معاه فون هواوي حاليا ف هو مش عليه اي خطر والفون هيكون كويس تماما ...

بس لو هتشتري فون في الوقت الحالي ف الاحسن تبعد عن هواوي لحد انتهاء المشاكل دي ...

__________

عشان هواوي تطلع من الازمه مش هيكون ليها غير حلين ..

يأما تدي لامريكا صلاحيات انها تشوف ال Source Codes بتاعتها وكمان تشوف ال Hardwares
بتاعتها عشان يتأكدو من عدم وجود اي software backdoor او اي hardware backdoor
من اللي ممكن يساعد على التنصت على امريكا زي ما صرحت الرئاسة بكده ...

الحل التاني انها تطلع نظام التشغيل اللي اتكلم عنه مؤسس الشركة في تصريحه ل CNN، اللينك :

اضغط هنا

_________

تليفونك مش خرده ومترميهوش ولا تبيعه ، بس خليك متابع لتفاصيل اول بأول !





دمتم بخير